Nan chak kwen lari, sou rezo sosyal, oswa nan ti mache lokal, ou ka remake yo—moun ki chita, ki mete de twa liv sou yon dra, sou yon tab, oubyen ki fè piblisite sou telefòn yo. Yo rele yo boukinis. E pi souvan pase sa, nou pa reyalize valè travay yo ap fè pou sosyete a.
Boukinis yo pa sèlman vann liv ansyen. Yo se gadò memwa. Yo kenbe liv ki ta ka disparèt. Yo pèmèt jenerasyon jodi a konekte ak ekriven ki pa sou Google, ak istwa ki pa nan telefòn. Gen boukinis ki gen liv ki te pibliye an 1950, 1970, oswa 1985—liv ki se temwayaj sou sa nou te ye, sou sa nou te viv.
Lè w achte nan men yo, ou pa sèlman fè ekonomi; ou mete tèt ou an kontak ak liv ki gen yon lespri, yon vwa, yon enèji. Anpil nan liv sa yo te deja fè chemen nan plizyè men. Yo gen istwa pa yo. Gen liv ou ap pran, ou ka jwenn not, dat, oswa ti mo moun te ekri ladann. Se tankou ou rantre nan yon dyalòg ak tout moun ki te li liv sa anvan ou.
Nan lòt peyi, gen gran mize ki ekspoze liv fin vye granmoun. Men lakay nou, boukinis se mize sa a. Yo se bibliyotèk mobil. Yo se transmisyon konesans, san pretansyon. Kidonk, se tan pou nou remèt yo respè yo merite. Se tan pou nou ankouraje moun achte nan men boukinis, pataje liv yo, mete yo sou sit tankou sa a pou pèmèt lòt moun dekouvri sa yo genyen.
Ann bay liv yon lòt vi. Ann remete boukinis yo plas yo. Paske lè w achte yon liv ki deja sèvi, ou mete lavi nouvo sou papye ansyen.
© Tout dwa rezève. reyalizasyon: Bing Bong Studio
